Another Cow In The Corn

Agora que o releo... que vello queda iso de ... sen soltar un peso. ;-)

---

Xa levo un tempo sen escribir algo productivo así que hoxe vai ser o día...

Levo un tempo traballando cunha IPBrick. Basicamente trátase dunha appliance que corre unha debian, e que pode proporcionar varios servizos, dos cales actualmente uso; a PBX virtual fornecida por Asterisk; o gateway de fax con servizo fax2mail e mail2fax por Hylafax; e o servizo de VPN a cargo de OpenVPN.

Para os servizos telefónicos que oferta Asterisk, utilizamos teléfonos IP físicos, mais hai a posibilidade de aproveitar os equipos informáticos por medios de softphones, que non son máis que aplicacións que convirten os ordenadores en terminales telefónicos. Os que esteades familiarizados con skype saberedes de que falo.

A finalidade desta entrada e comentar as aplicacións gratuitas (sen entrar en si é freeware, open source, etc.) que atopei para IPBrick (Asterisk). Común a todas elas é a utilización do protocolo SIP.

Tentarei salientar algúns puntos, e indicar as carencias, que sempre serán subxectivos, e primeiras impresións porque aínda non os usei moito tempo, ca esperanza de que sirvan de guía para alguén.

Imos aló:

Ekiga

Comezo por este por un motivo completamente subxectivo: está en galego!. Coñecido coma GnomeMeeting, é un port da aplicación para o escritorio Gnome GNU/Linux, a Windows. A versión actual é beta, vai pola 2.0.11.
Pros:

• Está en galego (tamén en castelán)
• Soporta múltiples contas
• Soporta H.323 co que tamén e compatible con Netmeeting.
• Video e Chat entre clientes.
• Sinxela interface.

Contras:

• Só permite unha liña.
• Quizáis demasiado sinxelo para un usuario avanzado.

Non podo deixar de poñer unha captura...


Ligazón á descarga da versión windows

X-Lite

Este é o que che recomendan e instalar dende IPBrick. Trátase dunha versión gratuita que oferta CounterPath, con limitacións sobre os seus productos de pagamento: eyeBeam e Bria.
Pros:

• Boa Interface
• Permite gravación de conversas
• Utilización de dúas liñas

Contra:

• Só en inglés
• Só soporta unha conta
• Algunha publicidade dos productos de pago (pouco molesta)

Descarga (solicita un e-mail) .

Express Talk

Probada a versión Express Talk Basic 3.08 desta aplicación de nch software que tamén teñen unha versión de pagamento, e tamén para PocketPC (mágoa dalgún dispositivo para probalo).

Pros:

• Permite gravación de conversas
• Ata seis liñas

Contra:

• Só en inglés
• Só soporta unha conta
• Instala o nch toolbox (que non sei para que serve) e un feixe de iconas para descarga dos seus productos, o cal semella abusivo.

Descarga.

3CX

O cliente 3CX VoIP forma parte do 3CX Phone System, un conxunto de servidor e cliente de PBX Virtual para windows que se pode atopar dende unha versión gratuita con soporte para 8 liñas. Non teño pensado probar de momento o servidor polo que me centrarei no softphone.

Pros:

• Apariencias (skins) intercambiables
• Versión en castelán
• Soporta varias contas
• Ata 3 liñas

Contra:

• Non permite cambiar o ID de usuario (Sempre aparece 3CXPhone).

Ligazón á descarga.

E ao final qué?

Terei que poñerllo a probar ás miñas ratas de laboratorio pero penso que vou atacar ás opcións primeira EKIGA e última 3CX, porque teñen o que precisamos, unha ferramenta simple, e que poidan entender.

Eu seguramente seguirei experimentando co que atope, porque opcións coma o voicemail son interesantes, a transferencia de chamadas, etc. poden facer que algún día desparezan os termináis telefónicos físicos de enriba dos nosos escritorios...

chuzame -

Levo uns días con moito choio, que sumado á ponte que disfrutei xunta máis traballo, e moitas cousas que contar que non sei se darei sacado á luz. De momento tiro dunha imaxe que curiosa da nosa terra.

Fusión... Qué outro nome pode ter esta mistura de palmeira e centola?

chuzame -

Onte fomos dar unha volta deica Cerdedo, para airearnos e probar de paso un pouco xabarín. Tras dar un paseo pola exposición e mercar pan (sempre o pan), fomos deica o Mesón Carola, a probar os tres pratos diferentes de xabarín que prepararon co gallo da festa. Tanto este como todos os demais locais estaban ate arriba de xente; pero grazas á influenza de Chus, irmán do dono, non tivemos problema en disfrutar dunha mesiña na pequena terraza, lonxe da formula 1 do fume do tabaco.

Como dicía, foron tres as preparacións que probamos; e tivemos a sorte de que nos foran servidas de menos a máis:

Xamón de Xabarín asado... que quizáis por ser moi magro estaba demasiado seco, aínda que xa estaba moi presente o sabor do porco bravo.

Xabarín estufado, a máis elaborada posibelmente, e que nos recomendaban se só fósemos elixir un dos pratos.

Costeleta de Xabarín, que estaba incríbel.

Finalmente, puidemos probar a famosa vincha, que aínda sin estar na presentación tradicional parcheou a miña débeda con esta sobremesa.

En canto ó prezo, dicir que a atención de Chus (compañeira dun curso que está a facer moraiminha) non se limitou a buscarnos un bo sitio para xantar, senón que tamén nos fixo algo de prezo na conta. Os tres pratos de xabarín, dúas racións de vincha, dúas cervexas, unha botella de auga de litro, e un par de viños e un Vermú branco non chegaron ós 34 euros. Grazas Chus!

O Mesón Carola é un mesón de pobo, onde todos, clientes e non clientes, semellan coñecerse e ter xa unha certa confianza; e para nós, foi unha moi boa oportunidade para degustar o xabarín, que tanto nos gusta, e que moi poucas veces se nos pon a tiro... gastronomicamente falando, quero decir, que pola caza aínda non nos deu.

chuzame -

Recentemente cambiamos de coche, e hoxe vou vender o meu antigo Corsa, que tantas historias podería contar se falara... A transmisión de vehículos perante a D.G.T. é un dos pasos a seguir para facer efectivo o cambio de titularidade. O impreso do organismo dependente do Ministerio de Interior ofrece un impreso bilingüe.... ou trilingüe, porque non sei se enfocalo coma neoloxismo, ou coma un xeito de que cultivemos unha nova língua (que non cheguei a identificala), porque xa temos suficientemente coidada a nosa.

Que xulgue cada quen:

É a máis salientable, mais non a única desagradable sorpresa...

chuzame -

Na nosa viaxe á República Checa mercamos un par de libros de cociña. De un deles, Cociña tradicional checa, publicado pola Asociación Checa de Chefs, foi do que saquei esta receita da tradicional Sopa de pataca que aínda que se parece á da foto do libro en cuestión, non sei se logrou o sabor desexado. Unha, porque non me recordou moito a ningunha das sopas de patacas que alí probamos; e dúas ( e igual máis importante) porque son case incapaz de facer un prato seguindo ó pé da letra a receita.

Ingredientes (os do libro)

• 20 g de manteiga
• 30 g de fariña branca
• 1 l de caldo básico de osos brancos
• 150 g de vexetais (cenoura, apio, pirixel, col rizada, allo porro, etc.)
• 150 g de cogomelos frescos ou 20 g se son secos,
• 50 g de cebola
• 50 g de touciño
• 400 g de patacas comino
• allo, pementa moída, mellorana e sal.

Preparación (tal como eu a fixen)

1. Por unha parte, poñer a cocer as patacas con auga , comino e sal. Como non dicía nada na receita, eu peleinas e boteinas enteiras para picalas unha vez cocidas.
2. Nunha tixola refretir en touciño (bacon afumado, foi o que utilicei) a cebola picada en anaquiños pequenos.
3. Por outra banda, preparar unha mezcla coa manteiga (como o libro non dicía nada, eu boteilla de porco, que é a que tiña na casa) e a fariña (que tampouco era branca, senón unha fariña integral asturiana) e fretir ata "que se poña rosada", dicía a receita... Pero como o concepto de "fariña rosada" non está na miña cociña, mezcleina ben como se fose para unha bechamel. Engadir o caldo (que como non tiña feito e non me gusta o de bote, sustituín po auga) e mezclar ben ate que comence a ferver. Engadir os vexetais (cenoura, allo porro e apio) cortados en cubiños, as setas secas(nesta ocasión, boletus que lle deron, penso un sabor moi especial á sopa) e un par de dentes de allo machacados.
4. Pasados uns vinte minutos, engádese o refrito de cebola e as patacas picadas en cubiños pequenos xunto coa auga de cocelas, pementa moída e mejorana ó gusto. Rectificar o sal, e cocer uns dez minutiños máis para que se mezclen ben todos os ingredientes antes de servir.

chuzame -